Biashara nyingi hushindwa si kwa sababu hazikuwa na uwezo wa kukua, bali kwa sababu zilijengwa kwa haraka ya leo badala ya maono ya kesho. Mtazamo wa muda mrefu ndiyo unaotenganisha biashara inayopita sokoni kwa muda mfupi na ile inayodumu, inakua, na kuacha alama.
Mtazamo wa muda mrefu huanza kwa kubadili namna unavyoitazama biashara. Biashara si mradi wa dharura wala njia ya kukimbia matatizo ya sasa. Ni safari. Na safari haiendeshwi kwa kukimbia kila hatua, bali kwa kupanga mwelekeo, kusimamia kasi, na kuvumilia umbali.
Mfanyabiashara mwenye mtazamo wa muda mrefu anaelewa kuwa matokeo hayaji mara moja. Hatarajii faida kubwa ndani ya wiki au miezi michache. Badala yake, anawekeza kwenye msingi—kujenga wateja, kuboresha huduma, na kujifunza soko. Anaelewa kuwa faida ya kweli huja kama matokeo ya uaminifu na uthabiti, si mbinu za mkato.
Mtazamo wa muda mrefu pia humfanya mfanyabiashara awe na subira katika maamuzi. Hakurupuki kubadilisha biashara kila inapokutana na changamoto. Hakimbilii kila fursa inayopita mbele yake. Anauliza: je, hili linanipeleka nilikokusudia miaka ijayo? Kama halilingani na mwelekeo wake, anaacha hata kama linaonekana linaingiza pesa haraka.
Kujenga mtazamo wa muda mrefu kunahitaji kukubali kuwa makosa ni sehemu ya mchakato. Badala ya kuyaona kama kushindwa, anayatumia kama somo. Biashara inayodumu hujengwa na watu wanaojifunza kutokana na makosa yao, si wanaokimbia kila wanapokosea.
Mtazamo huu pia huonekana kwenye matumizi ya fedha. Mfanyabiashara wa muda mrefu hatumii faida yote mara moja. Anaelewa kuwa pesa ni chombo cha kujenga, si cha kuonyesha. Anawekeza kwenye biashara yake, anaongeza uwezo, na hujiandaa kwa kesho badala ya kuishi kwa leo tu.
Zaidi ya yote, mtazamo wa muda mrefu hujengwa kwa nidhamu ya kila siku. Hakuna siku moja itakayokufanya ufanikiwe ghafla. Ni maamuzi madogo, yanayorudiwa kila siku, yanayojenga biashara imara. Leo unahudumia mteja vizuri, kesho unarekebisha kasoro, kesho kutwa unajifunza jambo jipya—taratibu, biashara inakua.
Ukweli ni huu: biashara inayojengwa kwa mawazo ya muda mfupi itakupa msisimko wa muda mfupi. Lakini biashara inayojengwa kwa mtazamo wa muda mrefu itakupa uhuru, uthabiti na amani ya akili.
Kama unataka biashara yako idumu, usiulize nitapata nini haraka? Jiulize ninatengeneza nini kwa miaka ijayo? Jibu la swali hilo ndilo litakalokuongoza kufanya maamuzi sahihi leo.
Kama ungependa kuimarisha fikra zako za muda mrefu kwenye biashara na maisha, vitabu hivi vitakusaidia kwa kina:
- NGUVU YA KUFIKIRI KWA UKUBWA – Kujenga maono makubwa na kufikiri mbali ya hali ya sasa.
- NGUVU YA KUWEKA MALENGO – Kusaidia kupanga na kufuata mwelekeo wa muda mrefu bila kuyumba.
- KUTOKA SIFURI MPAKA KILELENI – Safari ya kujenga mafanikio hatua kwa hatua bila kukata tamaa.
Kwa mawasiliano ya moja kwa moja na mwandishi au kupata vitabu vilivyopendekezwa (hardcopy, softcopy au audiobook):
👉 WhatsApp 0755 848 391
https://wa.me/255755848391
👉 WhatsApp 0684 408 755
https://wa.me/255684408755
Biashara ya leo iishi kwa kesho—anza kujenga mtazamo wa muda mrefu sasa.